fbpx
LajmeShëndeti

​Inspektorati Policor nis hetimin për arrestimin e dhunshëm të qytetarit në Prishtinë

Inspektorati Policor i Kosovës ka njoftuar se janë duke hetuar rast lidhur me pretendimet e ankuesit për tejkalim të autorizimeve policore gjatë përdorimit të forcës me rastin e arrestimit në sheshin “Nënë Tereza” në Prishtinë.

Inspektorati nëpërmjet një komunikate thotë se mbrëmë (e shtunë, 12.09) pas orës 22:00 përmes “Linjës së Kaltër” (numri i telefonit pa pagesë 080003333) kishte pranuar një ankesë lidhur me pretendimet e një qytetari për tejkalim të autorizimeve policore gjatë përdorimit të forcës nga disa zyrtarë policorë në një incident që kishte ndodhur më rreth orës 21 e 30 në sheshin “Nënë Tereza” në Prishtinë.

“Incidenti ishte raportuar të ketë ndodhur mbrëmë kur njësia policore gjatë realizimit të detyrave konkretisht gjatë patrullimit në sheshin “Nënë Tereza” ka hasur në qytetarin i cili ka qenë pa maskë mbrojtëse dhe është arrestuar nga policia me dyshimin për pengim i personit zyrtar gjatë kryerjes së detyrës zyrtare. Hetuesit e Inspektoratit Policor kanë dalë menjëherë në vendin e ngjarjes si dhe prokurori kujdestar dhe kanë filluar të ndërmarrin veprime hetimore lidhur me këtë rast. Ankuesi (i arrestuar nga policia) është dërguar për trajtim mjekësor përderisa raportohet se edhe një zyrtar policor ka pësuar lëndime trupore gjatë arrestimit.Hetuesit e IPK-së janë duke hetuar këtë rast lidhur me pretendimet e ankuesit për tejkalim të autorizimeve policore gjatë përdorimit të forcës me rastin e arrestimit si dhe pas tij”, thuhet në njoftim, përcjell Telegrafi.

Sipas inspektoratit, veprimet e mëtutjeshme hetimore lidhur me këtë rast për të sqaruar rrethanat e këtij incidenti do të vazhdojnë nga hetuesit e tyre në konsultim të vazhdueshëm me prokurorin përgjegjës.

Mbrëmjen e djeshme është arrestuar një person në sheshin “Nënë Tereza” në Prishtinë, pasi që ka qenë pa maskë. Arrestimi i qytetarit ngjalli shumë reagime për mënyrën se si policia veproi ndaj tij.

Lidhur me këtë, zëdhënësi i Policisë së Kosovës, Daut Hoxha ka treguar për Telegrafin se qytetarit i është tërhequr vërejtja disa herë, por nuk ka përfill urdhrat e zyrtarëve policorë.

Sipas Hoxhës, qytetarit i është kërkuar dokumenti i identifikimit nga zyrtaret dhe ka kuptuar se po i shënohet fletëparaqitje sipas Ligjit për pandeminë COVID-19 dhe ka filluar të përdorë shprehje dhe sjellje ofenduese e kërcënuese.

Artikujt e ngjajshëm

Leave a Reply

Your email address will not be published. Required fields are marked *

Back to top button
Close