A po e strehon dhe a e mundësoi arratisjen e Enver Sekiraqës Gjykata Speciale?
Për kapjen e Enver Sekiraqës, policia kishte urdhëruar mobilizim në çdo pikë kufitare.
Por ai, që 11 muaj më parë i iku drejtësisë kosovare, ka të ngjarë se në ndërkohë ka qëndruar në gjykatoren e Dhomave të Specializuara në Hagë, ku ka dëshmuar në gjykimin e katërshes së UÇK-së, lidhur me mbajtjen e tij gjatë luftës në një qendër ndalimi në Majac, merr vesh ekskluzivisht Klan Kosova.
Dyshimet u ngritën kur avokatja e Jakup Krasniqit, Venkatesfari Alagendra e pyeti Nuredin Ibishin, ish-komandantin e Brigadës 151 që përfshinte edhe Majacin, nëse ka njohuri se Sekiraqa është i arratisur nga drejtësia që e gjykoi me 25 vjet burgim për shtytjen e vrasjes së policit Triumf Riza.
Por, para se arratisja e Sekiraqës të kërkohej për t’u pranuar si provë, ndërhyri gjyqtari Gueanël Metroux.
Dyshimet i vulosi prokurorja Silvia D’Ascoli, kur tha se besueshmëria e Sekiraqës ishte diskutuar me të vetë.
ZPS nuk i ka kthyer ende përgjigje zyrtare Klanit nëse e ka intervistuar Sekiraqën në sesion privat, si shumica e seancave të kësaj vere.
Gjykata Speciale e cila juridikisht është pjesë e sistemit të Kosovës e ka pasur për detyrë që një vrasës edhe nëse e ka marrë si dëshmitar në Hagë, pas dëshmisë së tij do të duhej të kthehej në Kosovë për ta mbajtur burgimin.
Para dy ditësh, i dërguari presidencial për misione speciale në mbarë botën, Richard Grenell, ka thënë në llogarinë e tij në X se Gjykata Speciale ka bashkëpunuar me kriminelë të kërkuar nga Interpoli kundër Thaçit.
Gjykata Speciale ka bashkëpunuar me kriminelë e vrasës shqiptarë e serbë. Kjo gjë është dëshmuar përmes dokumenteve të shumta. Përpos me Enver Sekiraqën dhe Muharrem Ibrajn i cili kërkohet nga Interpoli për pjesëmarrjen e tij në masakrën ndaj shqiptarëve dhe i cili tashmë jeton në Serbi, Gjykata Speciale ka bashkëpunuar edhe me ushtarët dhe oficerët e ushtrisë serbe kundër krerëve të UÇK-së në Gjykatën Speciale. Ata kanë bashkëpunuar me komandantin serb, Milan Stanojeviq, i cili është përgjegjës për vrasjen e 377 shqiptarëve në Mejë të Gjakovës.
Kur policia e Kosovës dhe AKI-ja e arrestuan për spiunazh Bedri Shabanin dhe Muharrem Qerimin, Gjykata Speciale ishte alarmuar. Sipas burimeve mediatike, Gjykata Speciale kishte bërë presion që ata të liroheshin.
Pavarësisht se këta dy akuzohen për spiunazh për llogari të BIA-s serbe, kjo gjë aspak nuk iu lë përshtypje Gjykatës Speciale. Edhe pse ata kanë pasur plan të bëjnë një inskenim në spitalin ushtarak të UÇK-së në Mollopolc të Shtimes e të njëjtin ta ndërlidhin me të ashtuquajturën “Shtëpi e Verdhë” në Burrel.
