Si ndodhi vrasja e Ukë Bytyçit, kush ishte dorasi dhe si “djali i dorasit u rrah në vendin e punës, pranë shtëpisë së tij”

Ukë Bytyçi ishte kryetar i Komunës së Suharekës. Ai është vrarë më 27 tetor të vitit 2002. Edhe kjo vrasje si shumë vrasje të tjerë ishte shfrytëzuar për të atakuar njerëzit e caktuar të cilët s’kishin asnjë lidhje me rastin.

Vrasësi e ka kryer dënimin prej 20 vitësh dhe tashmë është i lirë. Motivi i këtij rasti të rëndë dihet.

Dorësi ishte Jetullah Mazreku i cili ishte bujk dhe i cili vjen nga një familje patriotike e cila ishte rreshtuar në radhët e UÇK-së bashkë me vëllezërit. Po ashtu edhe Ukë Bytyçi ishte pjesë e UÇK-së.

Si ndodhi incidenti?

Pas fitores së LDK-së në Suharekë, zyrtarët dhe simpatizantët e saj duke festuar, shkuan dhe provokuan familjen Mazreku pranë shtëpisë së tyre.

Kreshniku, fëmiu më i madh i Jetullahut, 15 vjeç, i cili në momentin tragjik kishte qenë duke punuar në lokalin e tyre me emrin e tij “Kreshniku”, kishte treguar po atë vit për gazetën “Epoka e Re”, sesi simpatizantët e LDK-së e provokuan, e rrahën dhe i shqyen posterët e Thaçit që ishin të varur në dyqan.

“Kam qenë në shitore, kam dëgjuar zhurmë, sirena e bam-bume, kur kam dalur jashtë kam menduar se mos është ndonjë dasëm, sepse atë ditë kanë qenë dy dasma në fshatin tonë. Kur dola jasht ata më provokuan, më shanin…”, kishte treguar Kreshniku, djali i Jetullahit i cili kishte vrarë Ukë Bytyçin.

Jetullahu i cili ishte duke u kthyer nga ara, ashtu me rroba të punës, kishte të mbathura çizme, tërë pleh e lloç, edhe ai provokohet dhe fyhet me fjalët ‘ta q… atë nanë’, “ti je shtazë e egër”.

Këto fjalë Jetullahut ia kishte thënë Halil Morina, ish-kryeshef i ekzekutivit të komunës së Therandës, gjë të cilën Halili edhe vetë e ka pohuar për gazetën “Bota Sot”.

“Kur Jetullahu ua kthen në të njëjtën mënyrë, “hajde, edhe unë juve jau q…” shtihet në të, ku plagoset mbi llërën e dorës së majtë dhe e mbulon gjaku”, kishte treguar familjari i Jetullahut atë kohë.

Në atë moment, Jetullahu nxjerr revolën nga brezi dhe sipas djalit të Jetullahut ai i kishte gjuajtur pa e ditur saktë se kush janë ata.

Jetullahu pasi e nxori armën nga brezi, shtiu me tre plumba në drejtim të Ukë Bytyçit dhe dy përcjellësve të tij, Bafti Bajramit e Bajram Bytyçit.

Pas asaj që ndodhi, Jetullahu u dorëzua në polici, me armën e tij, revolen “TT”.

“Vëllau im, Jetullahu ishte çoban, tash bujk. Ai nuk është anëtar i asnjë partie politike, shtiu në viktimat e tij, jo nga motivet politike, por pse ishte i provokuar, para shtëpisë së vet, kishte thënë Abdullah Kryeziu nga fshati Leshan.

Abdullah Kryeziu bën të ditur edhe këtë: “Ukë Bytyçin e kishim mik shtëpie. Ai vajzën e axhës e ka të martuar tek familja e gjerë Kryeziu. Me Ukën kurrë nuk e kemi pasur ndonjë të keqe, na vjen keq ajo që na ndodhi…”

Po ashtu, sipas versionit të zyrtarëve të LDK-së, Ukë Bytyçi u vra duke dalë nga vetura për të parandaluar këtë mosmarrëveshje.

Sekretari i PDK-së atë kohë, Fatmir Limaj, e kishte dënuar ashpër këtë rast duke kërkuar që të gjithë të përfshirët në këtë rast të arrestohen dhe dënohen.