Fatmir Limaj ishte mysafir në emisionin Debat Plus gjatë ditës së djeshme. Ai është shprehur i indinjuar me reagimin të cilin e ka quajtur pamflet të Kreut të ASHAK-it z. Mehmet Kraja.
“Mos harro, unë kam ndejtë dy vjet me Stanishiqin brenda në Hagë, s’ka sen që se di për qetu, shumë sene i di nga goja e tij, me dokumente që kam pa aty, kurrë s’kam folë, kurrë s’flas, për hatër të vendit se e du vendin tim shumë edhe për hatër të fëmijëve, unë s’flas, kurrë si flas këto tema, amo bërllogu jugosllav, boll më me këto fëlliqësira. Ka në Akademi të Shkencave bërllog jugosllav, polic politik që i njohim ne, po ka, ka plotë, që për statusin e vet individual, shoqëror e familjar ka ba lojë, e ka shitë e ka shpikë për vendin e tij“.
Seksioni i Shkencave Shoqërore të Akademisë së Shkencave dhe Arteve të Kosovës (ASHAK), është distancuar nga dokumenti “SYNIMET DESTABILIZUESE TË SERBISË NË KOSOVË DHE NË BALLKANIN PERËNDIMOR”, të publikuar në faqen zyrtare elektronike të ASHAK.
Pas një mbledhje të mbajtur këtë të premte, Seksioni i Shkencave Shoqërore ka dhënë disa sqarime lidhur me debatin që ka shpërthyer në publik rreth botimit dhe shpërndarjes siç thuhet, të paautorizuar të këtij dokumenti.
Në njoftimin e tyre bëhet e ditur se teksti është i kryetarit të Akademisë, Mehmet Kraja, dhe i njëjti ishte i paautorizuar për publikim.
“Seksioni, që në fillim e ka kundërshtuar publikimin e këtij teksti joshkencor në emër të Akademisë, që shihet nga Procesverbali i mbledhjes së 26 janarit 2022!”, thuhet në komunikatën për media.
Seksioni i Shkencave Shoqërore ka thënë se ka kohë që ia ka tërhequr vërejtjen Krajës për siç thuhet, sjelljet imponuese e arbitrare, e që po e lëndojnë rëndë dinjitetin e institucionit në krye të të cilit është.
“Me qasjen e tij jo-akademike dhe veçanërisht me publikimin e këtij dokumenti joshkencor, të hartuar nga vet ai, si drejtues i një institucioni prestigjioz shkencor, artistik dhe kulturor, sjellë përçarje me pasoja të rënda për vet Akademinë”.
Tutje, thuhet se “për shkak të papërgjegjësisë dhe veprimeve imponuese dhe arbitrare, Seksioni i Shkencave Shoqërore kërkon nga z. Kraja reflektim institucional dhe moral për dëmin e shkaktuar ndaj Akademisë dhe publikut të gjerë”.
“Nëse z. Kraja nuk reflekton karshi përgjegjësisë institucionale dhe morale, Seksioni i Shkencave Shoqërore do të iniciojë veprime të tjera statutore” .
Ndryshe, kryetari i Akademisë së Shkencave dhe Arteve të Kosovës, Mehmet Kraja, ka publikuar në faqen e tij në Facebook, një analizë të përgjithshme të Akademisë së Shkencave dhe të Arteve të Kosovës (të hartuar dhe publikuar në janar 2022).
Kraja thotë se ky dokument synon të tërheq vëmendjen e opinionit të brendshëm dhe faktorit ndërkombëtar se politikat e Serbisë ndaj Kosovës dhe rajonit të Ballkanit Perëndimor kanë njohur së fundi një trend riciklimi, janë bërë më agresive dhe destabilizuese për rajonin, duke krijuar një vazhdimësi të pakëputur të politikave që ndjek Serbia ndaj Kosovës që nga vitet tetëdhjetë të shekullit të kaluar.
Ndaj këtij dokumenti të publikuar ka reaguar edhe kryetari i Partisë Demokratike e Kosovës, Memli Krasniqi, duke thënë se i njëjti tingëllon më shumë si një memorandum anti-shqiptar. /Telegrafi/