Sava Janjiq: Ky është vendimi i lëshuar nga babai i “këshilltarit të Kurtit” për ndërtimin e Kishës (Dokument)

Reagim 2016:

Përfaqësuesi i Kishës ortodokse serbe në Kosovë, igumeni Sava Janjiq, ka shprehur shqetësimin e tij ndaj reagimit të mediave, kundër Kishës serbe të ndërtuar në kampusin e Universitetit të Prishtinës.

Kleriku ortodoks serb, përmes një postimi në llogarinë e tij në rrjetin social Facebook, ka ofruar dokumente se trualli për ndërtimin e Kishës në kompleksin universitar i është dhënë kishës Ortodokse Serbe në kohën e regjimit të Sllobodan Millosheviqit, dhe se ai vendim është lëshuar pikërisht nga babai i zëdhënësit të Lëvizjes Vetëvendosje, Erzen Vraniqi, nga Kryetari i atëhershëm i Këshillit Ekzekutiv të Komunës së Prishtinës, Hamdi Vraniqi, raporton Telegrafi.

Reagimit të tij, kleriku Janjiq ia ka bashkangjitur edhe faksimilen e vendimit të lëshuar nga Vraniqi, ku figuron se Kishës i është dhënë toka për ndërtimin e Kishës dhe objekteve të tjera përcjellëse fetare.

Janjiq shpreh pezmin se pse kryetari aktual i Komunës së Prishtinës, sipas tij pa asnjë vendim gjyqësor, ka ndërprerë punimet në kishë.

“Po i thonë kishë e Millosheviqit edhe pse pëlqimin për ndërtimin e saj në vitin 1990 e ka dhënë Hamdi Vraniqi, shqiptar i Kosovës dhe babai i zëdhënësit të sotëm të partisë së cilës i takon kryetari dhe e cila po bën fushatë kundër kishës”, thuhet në reagimin e igumenit Janjiq.

Më tej Janjiq, reagimit të tij i ka bashkangjitur edhe dëshmi, sipas të cilave edhe UNMIK-u ka vërtetuar pronësinë e kishës në një sipërfaqe prej 4.2 hektarësh në kompleksin e Universitetit të Prishtinës.

Me dëshminë e prezantuar nga igumeni Janjiq, demantohet reagimi Lëvizjes ndaj Vetëvendosje se nuk ishte baba i zëdhënësit të kësaj partie që ka lëshuar vendimin për dhënien e truallit për ndërtimin e Kishës në kampusin e UP-së. /Telegrafi/