Universiteti i Prishtinës ka ‘gëzuar’ stafin administrativ për festat e fundvitit me kompensime.
Ani pse kompensimet e tilla për festat e fundvitit, nuk parashihen me ligjin e pagave dhe si të tilla janë pagesa të palejueshme, punëtorët e UP-së ishin kompensuar të gjithë, që shuma në total ishte 30 mijë e 400 euro.
Ani pse me ligj nuk është e paraparë, Këshilli Drejtues i UP-së me 06.12.2018 kishte nxjerrë një vendim për të kompensuar të gjithë punonjësit e administratës së UP-së, me rastin e festave të fund vitit, transmeton Indeksonline.
Vlera e kompensimit ishte 100€ për punonjës. Pra, bazuar në këtë vendim, UP në muajin dhjetor 2018 kishte kompensuar të gjithë stafin e administratës.
Vlera financiare e kompensimit për 304 punonjës ishte në shumë 30,400€, transmeton Indeksonline.
Arsyetimi për këto kompensime ishte se KD i UP-së kishte vlerësuar se stafi i UP-së kishte volum të madh të punës gjatë vitit.
Kompensimet e tilla nuk janë në pajtim me ligjin. Kjo rritë rrezikun që paraja publike të shpenzohet në mënyrë jo të arsyeshme apo keq menaxhohet, si dhe të dëmtoj buxhetin e Universitetit.
ZKA ka rekomanduar Këshillin Drejtues, që të siguroj që para marrjes së çdo vendimi, të sqarohet qëndrueshmëria e bazës ligjore për të gjitha pagesat, si dhe kompensimet e tilla të mos përsëriten në të ardhmen.
Po ashtu, vendimi i Këshillit Drejtues të UP-së pika 10 përcakton: Rektori, prorektori, dekanët përveç mbajtjes së orëve mbi normë, nuk mund të kenë angazhim tjetër brenda dhe jashtë UP gjatë orarit të rregullt të punës.
Po ashtu, Ligji nr. 03/L-147 për pagat e nëpunësve civilë, neni 20 kompensimi i pagës, përcakton: nëpunësit civilë kanë të drejtë të marrin kompensim të pagës në këto raste: kompensimi për punë jashtë orarit të rregullt gjatë ditëve të punës, për punë jashtë orarit gjatë fundjavës dhe kompensim për punë jashtë orarit gjatë festave zyrtare, pastaj kompensim për pushim vjetor, për kohën e paaftësisë së vërtetuar të përkohshme për shkak të sëmundje, gjatë shtatzënësisë dhe lehonisë, kompensim në rast të shfrytëzimit të pushimit të veçantë me pagesë, në rast të perfeksionimit profesional të specializuar për nevojat e organit ose të shtetit.
Mirëpo, Universiteti i Prishtinës ka kompensuar stafin në kundërshtim me këto vendime, raporton Indeksonline.
UP në bashkëpunim me MAShT (në bazë të memorandumi të mirëkuptimit të nënshkruar me 21.11.2016) kishte vazhduar realizimin e programit “Avancimi dhe Kualifikimi i Mësimdhënësve” (AKM) dhe kishte organizuar Programin për Avancimin e Pedagogëve (PAP).
Në këtë memorandum është caktuar Këshilli Drejtues i AKM që përbëhej nga shtatë (7) anëtarë të UP-së dhe tre (3) anëtarë të MAShT-it si dhe një grup i stafit administrative7 për të implementuar këtë projekt.
Po ashtu, Rektori i UP-së është caktuar edhe Kryetar i Këshillit Drejtues (KD) të AKM.
Qëllimi i këtij programi ishte të sigurohet avancimi i pedagogëve të cilët janë në marrëdhënie pune nëpër shkollat e Kosovës.
Me vendim nr. 690 të datës 18.04.2016, Kryetari i Këshillit Drejtues të AKM-së kishte caktuar norma mujore për kompensime për anëtarët e Këshillit Drejtues të AKM-së si dhe stafin tjetër administrativë (8 zyrtarë).
Vlera e kompensimit ishte 590€, për Kryesuesin e KD, për anëtarët 490€ në muaj si dhe për stafin administrativ të cilat varirojnë nga 80€-300€, në muaj.
ZKA ka vërejtur se Këshilli Drejtues dhe stafi administrativ ishte kompensuar cdo muaj, ani pse nuk ka pasur dëshmi për të konfirmuar se të njëjtit kishin kryer punë shtesë jashtë orarit të rregullt të punës.
Shkaku i këtyre vendimeve ishte se menaxhmenti i UP-së ka konsideruar se angazhimet e tilla janë punë shtesë dhe për këtë duhet edhe të kompensohen.
Kompensimet e KD të AKM-së dhe të stafit administrativ, në mungesë të dëshmive për të konfirmuar se janë kryer punë shtesë jashtë orarit të rregullt të punës, rrit rrezikun e pagesave të parregullta.
Rekomandimi i ZKA-së është se rektori duhet të shtoj kontrollet për të siguruar se të gjitha pagesat e bëra për kompensime të jenë të dokumentuara me dëshmi, për të konfirmuar kryerjen e punës jashtë orarit të rregullt të punës. Në të kundërtën, në raste kur nuk ka dëshmi se të punësuarit kanë kryer punë jashtë orarit të rregullt të punës, kompensimet mos të bëhen dhe të ndërpriten menjëherë.Indeksonline/