Sipas fletarrestit serb, Rifat Jashari e ka mbështetur financiarisht Thaçin, këtë të fundit e quan terrorist
Shteti i Serbisë ka publikuar një listë të gjatë, sipas saj me “terroristët e UÇK-së. Fletarrestet zyrtare nga Beogradi u kanë bërë jo pak problem luftëtarëve të UÇK-së. Shteti i Serbisë vazhdimisht ka përdorur çdo mjet për të luftuar ushtarët e UÇK-së edhe në paqe, duke përgatitur dëshmitarë të rrejshëm në procese të ndryshme gjyqësore.
I përmendur në dosjen e Beogradit ishte edhe Rifat Jashari, vëllau i komandantit legjendar Adem Jashari.
Në dosje thuhet se “Në lidhje me këtë, ai siguroi dokumente të falsifikuara dhe ndihmoi një numër terroristësh shqiptarë, mes tyre Sami Lushtaku, Osman Ferizi, Lulzim Jashari dhe Jakup Nura, dhe u bëri të mundur marrjen e azilit politik në Gjermani”.
Gjithashtu thuhet se “Aktivitetet domethënëse të Rifat Jasharit ishin përqendruar në armatosjen e terroristëve shqiptarë. Gjithashtu, Ai mbështeti financiarisht partinë e Hashim Thaçit, që nga dita e themelimit të saj”.
Sipas fletarresteve serbe, Hashim Thaçi, Kadri Veseli bashkë me bashkëluftëtarë të tjerë përgjatë viteve 1992/1993 kanë sulmuar milicinë e Serbisë ku kanë mbetur të vrarë 4 milicë ndërsa janë plagosur edhe 3 të tjerë. Në mesin e luftëtarëve përmenden edhe disa të tjerë përfshirë Jakup Nurën e të tjerë.
Në fletarrest thuhet se ata janë trajnuar në kampet ushtarake të Shqipërisë në vitin 1991 e më pastaj janë rikthyer dhe kanë organizuar sulme të armatosura ndaj milicisë së Serbisë, strukturë kjo e cila vazhdimisht e torturoi popullsinë shqiptare anekënd Kosovës.
