Kush e vrau gazetaren e BBC që u ndihmoi refugjatëve kosovarë? përmendet Arkan

Muajin e shkuar ‘The Daily Star Sunday’ pati raportuar dyshimet se “dëshmi të reja, të pazbuluara” janë duke u vlerësuar për të zbardhur vrasjen e Jill Dando, më 1999.

Tash hetues serbë kanë thënë se duan të dinë nëse vrasja e saj ka lidhje me me një vrasje tjetër gati identike të gazetarit serb Slavko Çuruvina, pak ditë më herët.

Ata besojnë se këto vrasje mund të jenë të lidhura, pasi disa ditë para vrasjes, Dando bëri thirrje publike në televizionin BBC që t’u dilet në ndihmë refugjatëve të Kosovës, ndaj policia kishte dyshuar fillimisht se mund të ishte vrasje për hakmarrje.

Çuruvina u vra më 11 prill 1999, ndërsa Arkan – që ishte në listën e më të kërkuarve të Interpol dhe besohet të ketë porositur vrasjen e tij – u vra në Hotel ‘InterContinental’ në Beograd në janar të vitit 2000.

E veja e tij, Branka Prpa ka theksuar ngjashmëritë mes vrasjes së të shoqit dhe të gazetares Dando.

“Mendoj që kanë lidhje këto vrasje. Slavko nisi të binte për toke dhe kur u ktheva për të parë se çfarë po ndodhte, u godita me një armë në kokë. Derisa po bija për toke, pash një person me një pallto të zezë dhe një kapelë. E kur u shtriva për toke përkrah Slavkos, ky person e qëlloi atë në kokë”, tha ajo.

Zyrtarët serbë kanë shprehur dëshirë të flasin edhe me ish komandantin e Skuadrës Ajrore, John O’Connor për pretendimet e tij se “pista të qarta hetimi” qenë injoruar, transmeton Klan Kosova.

O’Connor ka thënë se ka informata për njeriun në të zeza që është parë të qëndrojë me telefon në dorë para shtëpisë së Jill në Fulham.

Ai beson se personi ishte vrasës serik dhe një nga dy të angazhuarit për ta përcjellë yllin televiziv.

“Personi i identifikuar ka qenë një dëshmitar i rëndësishëm. Por policia mbylli sytë para gjithçkaje porsa e kapën të gjorin Barry George”, ka thënë O’Connor.

George, 56-vjeç, u arrestua në vitin 2000 dhe u dënua për vrasjen e Jill, korrikun e vitit 2001. Ai u shpall i pafajshëm më 2008.

Reporterja Jill u vra më 26 prill, 1999. Ajo u shty për toke në prag të derës së shtëpisë së saj dhe u qëllua në kokë./telegrafi/