Avokatët e krerëve të UÇK-së: Prokuroria e Hagës po bashkëpunon me Beogradin, sikur Kosova të jetë pjesë e Serbisë
![](https://epilogu.com/wp-content/uploads/2022/03/thaci-the-veseli-780x405.jpg)
Katër avokatët e krerëve të Ushtrisë Çlirimtare të Kosovës, që janë të arrestuar nga Gjykata Speciale, kanë shfaqur dilema serioze në bashkëpunimin që e ka Prokuroria e Hagës me Beogradin zyrtar. Mbrojtja e Thaçit, Veselit, Krasniqit e Selimit, është bërë bashkë dhe po kërkon që Prokuroria e Specializuar të tregojë cilat materiale i ka marrë nga Serbia. Madje, pretendojnë që Prokuroria në Hagë po bashkëpunon me Beogradin zyrtar, nën parimin se Kosova është pjesë e Serbisë.
Në një përgjigje ndaj Prokurorisë që e kanë dërguar te gjyqtari, avokatët e katër ish-udhëheqësve të UÇK-së kanë vlerësuar se kjo e cenon rëndë procesin. Ata kanë bërë të ditur se janë mbi 1 mijë e 300 materiale të cilave nuk iu dihet vendi i origjinës.
“Përveç kësaj, Prokuroria keqinterpreton në mënyrë të rëndë parashtresat e Mbrojtjes, të cilat qartazi nuk kanë të bëjnë me ndonjë shkelje të ligjit serb. Në vend të kësaj, Mbrojtja thekson shkeljen e ligjit të Kosovës dhe rrezikun që bashkëpunimi Prokurori-Serbi të bëhet me supozimin e papranueshëm dhe të paligjshëm se Kosova është pjesë e Serbisë”, thuhet në parashtrimin të cilin e ka parë gazeta Nacionale.
“Thelbi i pozicionit të Prokuroria e Specializuar është se besueshmëria e informacionit që buron nga Serbia nuk është e ndryshme nga ajo e çdo ofruesi tjetër të informacionit. Kjo tentativë për të shpërfillur kontekstin politik në të cilin po gjykohet kjo çështje rrezikon shumë integritetin e procedurës. Ndjenjat anti-kosovare dhe anti-UÇK mbeten një faktor i rëndësishëm dhe me ndikim në politikën kryesore serbe deri në ditët e sotme”, thuhet më tutje në këtë parashtrim.
Sipas avokatëve, në asnjë mënyrë, materiali që është siguruar nga Serbia, nuk duhet të vlerësohet njëjtë sikur materialet e tjera në këtë procedurë. Sipas këtij parashtrimi, Prokuroria e Hagës ka siguruar mbi 13 mijë materiale nga Tribunali për Krime Lufte në Ish-Jugosllavi, 10 mijë e 500 nga EULEX-i dhe 8 mijë materiale nga Prokuroria Speciale e Kosovës.
Avokatët e Thaçit, Veselit, Krasniqit e Selimit kanë përmendur raste nga e kaluara në Tribunalin e Hagës, ku është tentuar manipulimi me dëshmitarë.
“Parë në këtë këndvështrim, pozicioni i Prokurorisë së Specializuar është qartësisht në kundërshtim me përkufizimin e Rregullës 103 dhe do të kishte pasoja të rëndësishme për procedurat ardhshme. Jo të gjithë ofruesit e informacionit ose informacionit janë të barabartë, dhe materiali që vjen nga Serbia për të mbështetur një gjyq kundër udhëheqjes së Ushtrisë Çlirimtare të Kosovës duhet të klasifikohet si Rregullë 103”, bëhet e ditur më tutje.
“Përveç kësaj, si me çdo traktat modern, marrëveshje të tilla ndërkombëtare duhet të bëhen publike. Bazuar në konsideratat e mësipërme, rezulton se çdo marrëveshje në lidhje me bashkëpunimin në çështjet penale me shtetet ose organizatat ndërkombëtare (dhe veçanërisht me Serbinë) i nënshtrohet ratifikimit nga Kuvendi dhe duhet të jetë i disponueshëm në faqen e internetit të KSK-së”, specifikohet më tej.
Në fund, mbrojtja ka kërkuar që kjo kërkesë e tyre të merret parasysh nga gjyqtari i procedurës paraprake.
Çka kërkuan avokatët?
Mbrojtja e të akuzuarve në Gjykatën Speciale, në muajin korrik u bënë bashkë dhe drejtuan një parashtrim, ku kërkuan që gjyqtari ta obligojë Prokurorinë të tregojë cilat materiale i ka marrë nga Serbia. Ndaj kësaj, u përgjigj Zyra e Prokurorit të Specializuar me arsyetimin se ato materiale, janë të njëjta sikur të gjitha të tjerat. Andaj, sipas tyre, nuk ka nevojë të dihet prejardhja.
Në kërkesën me shkrim të parashtruar nga avokatët, e cila ishte publikuar në faqen e Dhomave të Specializuara, thuhet se Serbia mbetet e angazhuar në një fushatë të vazhdueshme dezinformimi kundër Kosovës dhe UÇK-së, me qëllim të destabilizimit të shtetit.
“Në një gamë të gjerë vendesh të lidhura me konfliktin e viteve 1998-1999, Serbia ka përdorur vazhdimisht mjete mashtruese për të inkriminuar UÇK-në, për të minuar pavarësinë e Kosovës dhe për të shmangur përgjegjësinë për krimet e veta. Në veçanti, ajo ka kryer operacione të rreme, ka manipuluar skenat e krimit dhe ka siguruar dëshmi të rreme nëpërmjet torturës dhe detyrimit, duke ngritur shqetësime të bazuara në lidhje me besueshmërinë e informacionit që buron nga ky burim”, thuhet në shkresën e ekipeve mbrojtëse.
Avokatët e të akuzuarve në Hagë pohojnë se Task Forca Speciale Hetimore, e më pas Zyra e Prokurorit të Specializuar, kanë marrë një sasi të panjohur por të konsiderueshme të provave përmes marrëdhënieve të tyre bashkëpunuese me Serbinë.
Mbrojtja thotë se synon të kundërshtojë prova të tilla, por shton se zbulimi i ofruar për Mbrojtjen deri më sot është i paplotë dhe Zyra e Prokurorit të Specializuar nuk ka treguar gatishmëri për të qenë transparente në lidhje me marrëdhëniet e saj me Serbinë dhe për të përmbushur kërkesat e Mbrojtjes.
“Në bazë të rregullit 103, Mbrojtja kërkon që Gjyqtari i Procedurës Paraprake të urdhërojë Zyrën e Prokurorit të Specializuar t’ia zbulojë Mbrojtjes të gjitha informacionet në posedim të saj, të cilat fillimisht kanë ardhur nga Serbia, ose që në mënyrë të arsyeshme duket se kanë ardhur nga Serbia, si dhe prejardhjen e ndonjë materiali të tillë mbi të cilin Zyra e Prokurorit të Specializuar synon të mbështetet”, thuhet në shkresë.
Ekipet mbrojtëse të Thaçit, Veselit, Selimit dhe Krasniqit më tej kanë kërkuar nga Gjyqtari i Procedurës Paraprake që ta urdhërojë ZPS-në të zbulojë natyrën dhe shtrirjen e marrëdhënieve të Task Forcës Speciale Hetimore dhe ZPS-së me Serbinë, përfshirë bazën e saj ligjore, dhe veçanërisht materialet e nevojshme që Mbrojtja të kuptojë kushtet mbi të cilat informacioni u kërkua dhe u pranua, pasi kjo ka të ngjarë të ndikojë në kredibilitetin dhe besueshmërinë e saj.
Kjo, sipas ekipeve mbrojtëse, përfshin të gjitha kërkesat për ndihmë dhe/ose marrëveshjet e tjera të arritura ndërmjet SITF dhe/ose ZPS-së dhe Republikës së Serbisë ose ndonjë prej organeve a institucioneve të saj; të gjitha kërkesat për informacion dhe korrespondencën shoqëruese ndërmjet SITF dhe/ose ZPS-së dhe Republikës së Serbisë ose ndonjë prej organeve a institucioneve të saj; një përmbledhje të të gjitha kontakteve në lidhje me këtë rast ndërmjet ZPS-së dhe zyrtarëve nga Republika e Serbisë ose ndonjë organi a institucioni të saj; si dhe një listë të plotë të të gjitha dokumenteve dhe materialeve burimi i të cilave është Republika e Serbisë ose ndonjë organ a institucion i saj.