Haxhiu: Familjarët e mi me shtetësi zvicerane po konsultohen me avokatë për ta paditur Thaçin, në Gjykatën e Zvicrës

Ministrja në detyrë e Drejtësisë, Albulena Haxhiu, përmes një postimi të bërë në Facebook, ka vazhduar me akuza në adresë të presidentit Thaçi.

Haxhiu e quan Thaçin “President shpifës”, në lidhje me deklaratat e këtij të fundit për laboratorin e drogës për të cilat tha se janë të familjes së saj, ndërsa sot ka publikuar pamje nga një laborator droge për të cilin thotë se janë të familjes politike të VV-së.

Haxhiu ka thënë se familjarët e saj me shtetësi zvicerane janë duke u konsultuar me avokatët për ta paditur Thaçin në Gjykatën e Zvicrës.

Ky është postimi i plotë i saj:

President shpifës

Dje akuzoi që familja ime ka laborator droge, ndërsa sot, thekson familja politike. Sikur herën e parë po ashtu edhe herën e dytë, ai ka shpifur me qëllime të pista!

Ju njoftoj që lidhur me akuzat e shpifjet e tij, familjarët e mi me shtetësi zvicrane janë duke u konsultuar me avokatë për ta paditur Hashim Thaçin, në Gjykatën e Zvicrës.

Në anën tjetër policia DUHET ta demantojë Hashim Thaçin sepse ata i kanë informacionet e sakta.
Le të dalin e të flasin publikisht!