Mediat e Shqipërisë: Të infiltruarin e UDB-së, Kurti kërkon ta sjellë ambasador në Tiranë

Gjatë ditëve të fundit është njoftuar përmes medias së Kosovës se Ministrja e Punëve të Jashtme e Kosovës, Donika Gërvalla- Schwarz ka përzgjedhur për ambasador në Shqipëri, Idriz Zeqirajn me banim në Gjermani, i vetëshpallur si njohës i çështjeve politike.

Gjatë ditëve të fundit është njoftuar përmes medias së Kosovës se Ministrja e Punëve të Jashtme e Kosovës, Donika Gërvalla- Schwarz ka përzgjedhur për ambasador në Shqipëri, Idriz Zeqirajn me banim në Gjermani, i vetëshpallur si njohës i çështjeve politike. Idriz Zeqiraj, i akuzuar në të shkuarën si i infiltruar i UDB-së në radhët e Sigurimit të Shtetit Shqiptar gjatë diktaturës, është një figurë e kritikuar ashpër brenda jetës publike në Kosovë pasi çmendurisht kërkonte që aeroportit të Prishtinës t’i hiqej emri i Adem Jasharit sepse sipas tij, ky ishte thjesht një hero lokalist i mbivlerësuar. Pas minimizimit që i ka bërë publikisht figurës së heroit legjendar Adem Jashari, duket se obsesioni publik i ambasadorit të ardhshëm të Kosovës në Shqipëri, është pikërisht kryeministri shqiptar, Edi Rama.

Në shkrimet e tij, Zeqiraj etiketon dhe akuzon si bashkëpunëtor të Serbisë dhe Presidentit Serb, kryeministrin Rama, ndonëse vetë ai nuk jep e zbulon ndonjë provë të përfshirjes së Ramës në pazare me Vucic.

“Duke qenë se po bashkëpunon fort me shtetin armik të Kosovës, Serbinë dhe kryeministrin e saj, Aleksandër Vuҫiqin, bashkëpunëtorin e kriminelit Millosheviҫ që kreu gjenocid në Kosovë, Rama po i jep ‘krahë’ për krimet e kryera”, shkruan Zeqiraj duke iu referuar nismës “Open Ballkan”. Pra siç duket, Zeqiraj është gjithë kohës duke përcjellë narrativën e një skenari ogurzi kundër Kosovës që thurret pikërisht në Shqipëri. Përpara këtyre deklaratave të palogjikshme dhe fyese ndaj shtetit shqiptar dhe kryeministrit të vendit, lind pyetja se si mundet të përfaqësojë gjysmën më të mirë të Shqipërisë, Kosovën në Tiranë, një figurë si Zeqiraj i cili Tiranën zyrtare e akuzon si armik të vendit të tij?

Si mundet që kjo figurë përçarëse të kontribuojë për interesat reciproke të dy vendeve të cilat i kanë njësoj sytë nga e ardhmja? Si mundet që ky njeri që e shpall Shqipërinë shtet anormal, cinik, përbuzës, sabotator kundër Kosovës vetëm se merr pjesë në iniciativa të integrimit ekonomik rajonal ku merr pjesë edhe Serbia, t’i shërbejë fqinjësisë së mirë dhe marrëdhënieve vëllazërore mes dy vendeve?

Dhe si mundet që kostumin e diplomatit të Kosovës, qeveria e Albin Kurtit t’ja veshë një ish agjenti të shërbimit sekret UDB, për të cilin nuk ka asnjë vlerë sakrifica e luftës së Adem Jasharit? Fakti është se qeveria e Albin Kurtit i cili kohët e fundit duket se është investuar në një debat politik kundër Shqipërisë, zgjedh që të dërgojë si ambasador në Tiranë njeriun më të devotshëm në sulmet publike mbi shqiptarët. E ndaj emërimi i tij si ambasador në Tiranë do të ngjante me aktin e përdorimit të një kamikazi të gatshëm për të ndezur më tej urrejtjen politike të qeverisë Kurti mbi shqiptarët, akt i cili hedh në erë parimet morale që historikisht kanë mbajtur gjallë marrëdhënien Kosovë-Shqipëri./ Lexo.al