Guaido deklaron se ka nisur “fazën finale” kundër pushtetit të Maduros

Lideri opozitar i Venezuelës, Juan Guaido ka thënë se ka nisur “fazën finale” të planit të tij për ta larguar nga zyra presidentin e kontestuar, Nicolas Maduro duke pretenduar se ka mbështetje nga “ushtarë trima”.

Zyrtarët e qeverisë së Maduros kanë dënuar hapat e Guaidos më 30 prill, duke i cilësuar si tentime për grushtet, derisa agjencia e lajmeve Reuters ka raportuar se është hedhur gaz lotsjellës kundër Guaidos dhe dhjetëra burrave me uniforma policore jashtë bazës ajrore në Karakas.

Ministri i Informimit, Jorge Rodriguez ka thënë përmes një postimi në Twitter se Qeveria është duke u përballur me tentime të vogla për puç, të udhëhequra nga “tradhtarë” të mbështetur nga kundërshtarët e krahut të djathtë.

Guaido, që pretendon të ketë presidencën dhe është i mbështetur nga Shtetet e Bashkuara dhe shtete tjera, është parë në disa xhirime në një bazë ajrore bashkë me ushtarë të armatosur rëndë.

Ai ka thënë se ushtarët që kanë dalë në rrugë janë duke mbrojtur kushtetutën e Venezuelës, një ditë para marshit të planifikuar antiqeveritar.

“Momenti është tani”, ka thënë ai.

Shtetet e Bashkuara dhe më shumë se 50 shtete tjera kanë njohur Guaidon si president të përkohshëm, transmeton rel.

Shtëpia e Bardhë ka thënë se presidenti amerikan, Donald Trump është njoftuar për ngjarjet në Venezuelë dhe është duke monitoruar situatën.

Rusia, Irani, Kina dhe Kuba janë disa janë shtetet që kanë mbështetur socialistin Maduro, i cili ka nisur mandatin e dytë si president në janar të këtij viti.

Protestat ndaj tij janë nxitur pas inflacionit të lartë dhe pretendimeve për abuzim me të drejta të njeriut.