Cen Desku flet për arrestimin e tij në luftë: UNMIK-u ka falsifikuar deklaratat e mia
Bashkëthemeluesi i degës së LDK-së në Komunën e Malishevës, Cen Desku gjatë 30 tetorit të vitit 1998 ishte arrestuar nga strukturat e UÇK-së.
Shtabi i Përgjithshëm i UÇK-së në atë kohë kishte lëshuar komunikatë për arrestimin e tyre. Cen Desku dhe një tjetër aktivist i LDK-së konsideroheshin të dëmshëm për luftën e UÇK-së.
Mirëpo, Desku në “Debat Plus” thotë se ai ishte arrestuar për arsye politike sepse ishte themelues i LDK-së.
“Jam arrestuar nga gjashtë persona. Katër prej tyre i kam njohur, ndërsa dy prej tyre nuk i kam njohur”, deklaroi Desku, përcjell Telegrafi.
Ai thotë se në atë kohë ka pasur disa keqkuptime mes LDK-së dhe UÇK-së, derisa personalisht thotë se për shumë kohë ka qenë pjesë e mbrojtjes së armatosur.
Desku thotë se dëshmitë e tij pas luftës janë falsifikuar nga UNMIK-u dhe se ai asnjëherë nuk kishte pasur fjalë të këqija për UÇK-në.
“UNMIK-u ka falsifikuar deklaratat e mia. Nuk e di qëllimin e tyre, por edhe mund të kenë pasur qëllim të bëjnë përçarjen e shqiptarëve”.
Desku thotë se personalisht asnjëherë nuk e ka thënë se “ai është arrestuar nga Hashim Thaçi”.
“Unë kam thënë se të tjerët më kanë thënë se jam arrestuar [me urdhër] nga Hashim Thaçi”, deklaroi ndër të tjera Cen Desku./Telegrafi/
