Ndodh edhe kjo, ministria e Albulena Haxhiut: Ne e paguajmë vetëm 1 avokat për Thaçin, jo edhe të tjerët
Ministria e Drejtësisë, nëpërmjet një komunikate për shtyp të martën, tha se të gjitha pagesat për mbrojtjen e ish-presidentit kosovar, Hashim Thaçi, i cili akuzohet nga Dhomat e Specializuara të Kosovës (DHSK) në Hagë të Holandës për krime të pretenduara lufte, janë realizuar me kohë.
Gregory Kehoe dhe Joe Reeder, avokatët e deritanishëm të ish-presidentit kosovar në procesin gjyqësor, kanë kërkuar të tërhiqen nga mbrojtja e Thaçit për shkak të mosrealizimit të pagesave. Ministria e Drejtësisë njoftoi se realizon pagesa vetëm me avokatet më të cilët ka marrëveshje, në përputhje me legjislacionin në fuqi.
Ekipi mbështetës i përbërë nga Gregory Kehoe, Joe Reeder, Greenberg Legal Associates dhe anëtarët e kësaj kompanie, kanë kërkuar të tërhiqen nga mbrojtja e ish-presidentit të Kosovës, Hashim Thaçi, në rastin e tij në Gjykatën Speciale.
Si arsyetim në kërkesë është përmendur moskryerja e obligimeve ndaj tyre.
“Thaçi nuk ka përmbushur detyrimin ndaj Gregory Kehoe, Joe Reeder, Greenbuerg Legal Associates dhe anëtarëve të ekipit mbështetës dhe Thaçit i është dhënë një paralajmërim i arsyeshëm se do të kërkonin përfundimin nëse nuk u është përmbushur detyrimi”, thuhet në njoftimin e Dhomave të Specializuara.
Në njoftim është përfshirë kërkesa zyrtare e mbrojtjes së Thaçit, derisa thuhet se sipas rregullores, kur të caktohet grupi tjetër i mbrojtjes, avokatët paraprakë duhet të vazhdojnë të bashkëpunojnë “në një periudhë prej jo më shumë se 45 ditë”.
Ndryshe, Gregory Kehoe u emërua këshilltar drejtues nga sekretari për të përfaqësuar z. Thaçi më 25 maj 2021.
