PSD konsideron se marrëveshjet e reja me Serbinë po e dërgojnë dialogun në rrugë të gabuar
Partia Socialdemokrate konsideron se dialogu me Serbinë po shkon drejt rrugës së gabuar.
Duke iu referuar marrëveshjes parimore e cila është arritur mes Kosovës dhe Serbisë për linjën hekurudhore, PSD thotë se ky proces është i mbyllur, kurse qytetarët po vendosen para aktit të kryer.
Sipas tyre, linja ajrore Prishtinë- Beograd e desubjektivoi Kosovën sepse baza juridike e Marrëveshjes është Rezoluta 1244, derisa shtojnë se mënyra e njëjtë vështirë se prodhon rezultate të ndryshme.
“Marrëveshja e re u paralajmërua nga deklarata për shtyp e vizitës së ambasadorit amerikan Grenell në Beograd. Kjo deklaratë zbuloi edhe diçka: se krerët në pushtet e të opozitës kanë dhënë pëlqim për marrëveshjet e arritura pavarësisht përmbajtjes e pa i parë mirë ato. I pyetur nga Koha Ditore ambasadori Grenell ka thënë: ‘për marrëveshjen në fjalë e ka pëlqimin edhe nga qeveria në detyrë, por edhe nga partitë politike që po negociojnë për koalicionin qeverisës’”, thuhet në njoftim.
Sipas tyre, marrëveshjet e arritura nga ky proces janë të dëmshme sepse secila marrëveshje mbi fushën konkrete që nuk paraprihet nga marrëveshja politike e njohjes reciproke cenon subjektivitetin politik të Republikës së Kosovës.
PSD-ja thotë se negociatat midis VV-së dhe LDK-së nuk duket se e kanë pasur subjekt diskutimi këtë çështje.
“Mosmarrëveshja e tyre nuk është dialogu me Serbinë, por as programi e cilësia e qeverisjes. Siç duket diskutimet e tyre lidhen vetëm për hisen e pushtetit. Marrëveshjet e tilla, larg syve të publikut dhe në dëm të shtetësisë së Kosovës nuk duhet të ndodhin. Kosova duhet t’i identifikojë dhe t’i mbrojë interesat jetike të saj në dialogun me Serbinë. Ndërkaq, arsyeja kryesore e kësaj gjendjeje bllokuese është fakti që ky proces ka qenë pjesë e llogarive ditore për ruajtjen ose marrjen e pushtetit”, thuhet në njoftim.
