Shkarkimi i Shefit të Hetimeve a u bë sepse zbuloi aferat e mëdha korruptive të VV-së?
Para pak ditësh u shkarkua nga detyra Shefi i Njësisë së Veçantë të Hetimeve në Policinë e Kosovës, Shemsi Haziri. Po ashtu, Albin Kurti ka shprehur pakënaqësi edhe me kryeprokurorin e zgjedhur, Besim Isufajn. A është duke ndodhur kjo pas zbulimit të aferave korruptive nga zyrtarët e lartë të VV-së?!
60 mijë euro kesh janë gjetur në pronën e njërit nga dy të dyshuarve për korrupsion, Faruk Mujkës dhe Hysen Muzliukajt, të arrestuar sot në një operacion të mbikëqyrur nga Prokuroria Speciale.
Prokuroria Speciale ka njoftuar se policia ka realizuar sot bastisje në pronat e Faruk Mujës, Kryeshef i “Ibër-Lepencit” dhe Hysen Muzliukajt, këshilltar i ministrit Faton Peci.
Ata dyshohen për korrupsion në kohën kur ishin pjesë e qeverisjes së Agim Bahtirit të Lëvizjes Vetëvendosje në Komunën e Mitrovicës.
Njoftimi i plotë i Prokurorisë Speciale:
Me kërkesë të Prokurorisë Speciale të Republikës së Kosovës, sot është lëshuar Urdhëresa për bastisje nga Gjykata Themelore në Prishtinë – Departamenti Special, në dy lokacione, pronë e dy të dyshuarve me inicialet F.M. dhe H.M.
Nën mbikëqyrjen e Prokurorisë Speciale, Policia e Kosovës, Njësia e Veçantë e Hetimeve, ka kryer bastisje në këto dy lokacione, pronë e dy të dyshuarve. Gjatë bastisjes në njërin lokacion, ndër të tjera janë gjetur dhe sekuestruar shuma e të hollave prej gjashtëdhjetë mijë (60.000.00) euro.
Prokuroria Speciale njofton se ekziston dyshimi i arsyeshëm se të pandehurit F.M dhe H.M, në cilësi të personave zyrtarë, me dashje kanë shfrytëzuar detyrën apo autoritetin zyrtar me qëllim të përfitimit të dobisë së kundërligjshme pasurore për vete apo për tjetrin, kanë tejkaluar kompetencat e tyre zyrtare dhe nuk i kanë respektuar detyrat dhe përgjegjësitë e tyre që të ushtrojnë funksionin e tyre në bazë të ligjit.
Prokuroria Speciale e Republikës së Kosovës lidhur me këtë rast njofton opinionin publik se në maj të vitit 2022 ka pranuar informacione, lidhur me dyshimet për keqpërdorim të pozitës dhe autoritetit zyrtar nga dy persona, në atë kohë pjesë e strukturave udhëheqëse në komunën e Mitrovicës së Jugut.
Menjëherë pas pranimit të këtyre informacioneve PSRK ka autorizuar Policinë e Kosovës, për ndërmarrjen e veprimeve hetimore, me qëllim mbledhjen e provave.
Pas marrjes së informacionit në bazë të autorizimeve të PSRK-së, Policia e Kosovës ka ndërmarrë një sërë veprimesh hetimore, ndërsa me datë 03.07.2023, ka paraqitur Kallëzim Penal ndaj zyrtarëve me inicialet F.M. dhe H.M., me dyshimin se gjatë kohës sa ishin pjesë e udhëheqësisë në komunën e Mitrovicës së Jugut, gjatë vitit 2021, janë përfshirë në kryerjen e veprës penale ‘’Keqpërdorim i pozitës dhe autoritetit zyrtar’’, e sanksionuar me nenin 414 të Kodit Penal të Republikë së Kosovës.
