Arkani ishte shndërruar në problem për CIA-n, çfarë thotë raporti i 1999 për kriminelin serb
Derisa bombardimet e NATO-s ndaj ish-Jugosllavisë vazhdonin, inteligjenca amerikane (CIA) e kishte vënë nën shënjestër të vëzhgimit njërin prej kriminelëve më të mëdhenj serb, Zeljko Raznatovic, i njohur ndryshe si Arkani.
Sipas raportit të CIA-s, të prillit 1999, të cilën e ka siguruar Demokracia.com, inteligjenca amerikane kishte informacion se figura e botës së krimit, Arkan, mund të planifikonte sulme terroriste në Evropë.
Ja një pjesë e raportit të inteligjencës amerikane:
Sulmet e NATO-s kundër caqeve serbe kanë nxitur kundërshtarët e NATO-s dhe serbët etnikë të kryejnë disa sulme terroriste dhe protesta të dhunshme në vende të ndryshme. Ekstremistët serbë në komunitetet e emigrantëve, simpatizantët serbë dhe grupet terroriste të majta ndoshta do të rrisin protestat e dhunshme dhe sulmet spontane kundër interesave të SHBA-së dhe NATO-s në mbarë botën, ndërsa sulmet e NATO-s vazhdojnë kundër objektivave serbe.
Nga ana e saj, Jugosllavia thuhet se po planifikon operacione terroriste në hakmarrje për sulmet e NATO-s. Udhëheqësi paraushtarak serb dhe figura e botës së krimit Zeljko Raznjatovic, i njohur si Arkan – dhe Lëvizja e Rezistencës e dyshuar e Organizatës Terroriste Serbe (STOP) gjithashtu mund të jetë duke planifikuar hakmarrje terroriste në Evropën Perëndimore dhe në Ballkan.
