Salihu eskalon: Për Jusuf Gërvallën edhe sot e kam bindjen se ai është dërguar nga shërbimi sekret serb?

Kosova Sot 17 Mars 2012, 22:56
“Kosova Sot”: Z. Salihu, ish-themeluesi i LPK-së Ibrahim Kelmendi ka bërë një denoncim të rëndë kundër jush, duke ju akuzuar për vrasjen e heronjve Gërvalla dhe Kadri Zeka, cili është komenti juaj?

Salihu: Së pari dua të them që Ibrahim Kelmendi duhet të vizitohet nga ndonjë psikiatër a është mirë. Edhe me këtë avancim që ia bëni, pra si ish-themelues, është në kundërthënie me të, sepse në kohën kur ai paraqitej si themelues i LPK-së, për Ibrahim Kelmendin kanë propaganduar edhe mediet jugosllave se ai përfaqëson një organizatë të madhe “Cerveni narodnik”, front i Serbisë, për të cilën ka shkruar edhe “Rilindja”, dhe tash na del që ai e paska themeluar LPK-në. Ibrahim Kelmendi gjithmonë ka qenë një spekulant, shpifës edhe këto që i ka nxjerrë tani janë dezinformata dhe asgjë tjetër.

“Kosova Sot”: Pse mendoni se Kelmendi ka bërë akuza kundër jush, ai numëron një varg faktesh siç thotë se i ka për vrasjen e Gërvallëve dhe Zekës dhe që ju involvon ju në këtë vrasje.
Salihu: Ato që ai i quan fakte, në fakt janë shpifje, nuk ka kurrfarë faktesh. Për mua ai është vetë pjesëmarrës, nuk është doras, por pjesëmarrës si informator, sepse vrasja ka ndodhur ndryshe. Unë e kam lexuar intervistën që ka dhënë ai dhe është në kundërthënie me të.
Kelmendi fuste njerëz në burgje, punoi për shërbime sekrete

“Kosova Sot”: Pse ju keni akuzuar Kelmendin për vrasjen e Gërvallëve dhe Kadri Zekës, a keni fakte për këtë?
Salihu: Kelmendi nuk është i akuzuar drejtpërdrejt, ai ka futur njerëz në burgje si në Kosovë në Jugosllavinë e atëhershme ashtu edhe në Gjermani. Ai ka qenë një spiun i vogël, ku i ka dhënë informata policisë këtu dhe në Gjermani, me qëllim që njerëzve t’u krijojë probleme. Kelmendi është thirrur si një veprimtar, por ai ka qenë e kundërta veprimtarëve. Ai ka punuar për shërbimet sekrete.


“Kosova Sot”: Çfarë provash lidhur me këtë vrasje jeni i gatshëm t’i ofroni Prokurorisë?
Salihu: E lexova intervistën që ka dhënë për “Kosova Sot”, ku thotë se gruaja e Maksut Saramatit ka qenë e burgosur dhe më akuzon mua për gjëra që s’janë të vërteta. Gruaja e Maksut Saramatit nuk ka qenë kurrë e burgosur, por vëllai i Maksut Saramatit dhe disa të tjerë janë burgosur me kallëzim të Ibrahim Kelmendit. Ibrahim Kelmendi ka ardhur nga Gjermania kur e ka kuptuar se Hysen Gega po vjen në pushim, por kishte kontakte me dhëndrin e Hysen Gegës, ku i ishte thënë se ai po shkon në Kosovë dhe po dërgon materiale. Ibrahim Kelmendi ka ardhur këtu dhe ka shkuar te Hysen Gega, dhe në kohën kur ka shkuar atje ka thënë se nuk guxon të shkojë në Jugosllavi se është arratisur nga atje dhe nëse kthehet, do ta burgosin si veprimtar politik, por kah ka ardhur nuk e ka burgosur askush, por ka futur njerëz nëpër burgje. Këtu ka shumë gënjeshtra që thotë në zhdukje të dokumenteve. Janë burgosur 20 veta që i ka njohur Ibrahim Kelmendi dhe ata janë burgosur të gjithë brenda një dite. Në nëntor të vitit 1979, ndërsa ata që nuk i ka njohur Ibrahim Kelmendi vazhdonin të vepronin edhe gjatë vitit 1980, sepse nuk ishin zbuluar ende. Ata që janë burgosur i ka denoncuar vetë Ibrahim Kelmendi.
Jusufi nuk kishteasnjë organizatë

“Kosova Sot”: Kush mendoni ju se është përgjegjës për vrasjet e heronjve?Salihu: Mendimet që i kam shfaqur në televizion dhe po i ritheksoj edhe këtu se në vitin 1982 vrasjen e ka bërë policia sekrete gjermane, nuk ka teori tjetër. Ibrahim Kelmendi ka shërbyer si informator, ka shkuar në shtëpi të shohë kush është brenda etj., por veprën e ka kryer polica sekrete gjermane. Këtu mund të flasim se cilat kanë qenë arsyet dhe çka e ka shtyrë policinë gjermane ta kryejë këtë vepër, këto janë gjëra të tjera. Nuk e them këtë për ta shfajësuar UDB-në, sepse ajo ishte vrasëse, se ka vrarë njerëz, por te ky rast ka qenë diçka tjetër, ishte një rast tjetër.

“Kosova Sot”: Ku ishit ju kur u vranë vëllezërit Gërvalla dhe Kadri Zeka?

Salihu: Kur janë vrarë vëllezërit Gërvalla dhe Kadri Zeka unë kam qenë në Bremen, sepse kam qenë në gjendje jo të mirë shëndetësore, madje atje kam një motër. Në Bremen më kanë parë edhe shtetas gjermanë, të cilët edhe e kanë konfirmuar që isha atje. Nuk ka vend këtu për asnjë lloj spekulimi.

“Kosova Sot”: A ishit ju themelues i grupit komunist “Zëri i Kosovës” dhe cilat ishin qëllimet e këtij grupi?

Riza Salihu: Po, isha themelues i grupit “Zëri i Kosovës” dhe në kohën kur është themeluar nuk ka pasur organizata të tjera, siç po orvatet tash të paraqesë Ibrahim Kelmendi. Grupi “Zëri i Kosovës” u themelua më 1978 dhe ishte kjo organizatë që solli edhe organizimin e 1981-shit. Nga viti 1978 deri në 1981 ishte grupi “Zëri i Kosovës” që ka përgatitur popullin për çdo gjë dhe ka ngritur në një nivel krejt vetëdijen e shqiptarëve të Kosovës.

“Kosova Sot”: Kelmendi thotë se qysh në dhjetor të vitit 1979, sapo Jusuf Gërvalla është arratisur në Gjermani, ju kohën më të madhe e keni kaluar në stacion të trenit në Shtutgard të Gjermanisë, duke dezinformuar bashkatdhetarët se UDB-ja ka dërguar udbashin e rrezikshëm Jusuf Gërvalla për të spiunuar shqiptarët patriotë dhe për të përçarë organizatat ilegale. Cila është e vërteta sipas jush?

Salihu: Në qoftë se “Zëri i Kosovës” vepronte dhe vjen Jusuf Gërvalla në fund të dhjetorit të 1979-s dhe tash kush kë zbulonte. Vinte ai për t’i zbuluar ata që vepronin, apo do të duhej që të gjithë ata që vepronin ta zbulonin një person që po vinte. Të jemi të qartë këtu, sepse vrasja është si një tërmet që shkatërron gjithçka. Ka ndodhur vrasja dhe përnjëherë fillon një qasje tjetër dhe të gjithë krijojnë një bindje më ndryshe. Por, deri në vrasje Jusuf Gërvalla nuk ka pasur asnjë organizatë, ishte grupi “Zëri i Kosovës” që vepronte. Jusuf Gërvalla kur ka ardhur të takohet me mua është prezantuar rrejshëm, duke thënë se është anëtar i Komitetit qendror të Kosovës, por Kosova nuk ka pasur komitet qendror, pastaj jo jam anëtar i kësaj apo i asaj organizate që nuk ekzistonte fare. Dhe atë që thatë flinin në stacion, kjo është metoda e Ibrahim Kelmendit për ta denigruar dikë. Ta them edhe një kundërargument, nëse unë kam jetuar dhe shëtitur nëpër qendër të Shtutgardit, atëherë çka i duhej Ibrahim Kelmendit të fshihej në stacion, që do të thotë se ai sot mund të ishte në Shtutgard, nesër në Hamburg apo në Bruksel. Vetëm për bileta që udhëtonte do t’i duheshin së paku 10 mijë marka gjermane në muaj, nga i vinin ato para në qoftë se jo nga Beogradi, nga ku? Ai asnjëherë nuk e ka marrë guximin të ballafaqohet me mua dhe ka pasur njerëz që e kanë përzënë nga banesa, sepse ai gjithmonë ka shpikur dhe tani këtë gjë që e bën nuk e ka për herë të parë. Ibrahim Kelmendi gjithmonë ka qenë një gënjeshtar, dezinformator i paturpshëm dhe gjithmonë në kundërthënie me atë që po thotë.
Kelmendi nuk ndodhej në Gjermani

“Kosova Sot”: Ai thotë gjithashtu se në janar të vitit 1980 Riza Salihu, në cilësi të kryetarit të grupit dhe “në emër të organizatës”, e urdhëron Hysen Gegen për ta vrarë Jusuf Gërvallën, me arsyetim se është udbash i rrezikshëm. Kjo është një akuzë e rëndë apo jo? Thotë se vetë është dëshmitar, por edhe Hysen Gega, Maksut Saramati. Cila është përgjigja juaj për këtë akuzë?

Salihu: Përgjigjja ime për këtë akuzë është se kjo është gënjeshtër e kulluar. Ata në fillim të vitit 1980 e kishin menduar një gënjeshtër të këtillë. Por, kjo gjë nuk është e vetmja që ka bërë Ibrahim Kelmendi. Ai në vitin 1989 shkon në policinë gjermane, ku bën një kallëzim dhe bën deklaratë tjetër nga ajo që ka dhënë më herët, pra është kundërthënëse me vetveten. Por, për shkak të deklaratave të tij të rrejshme unë jam arrestuar në Gjermani dhe jam liruar i pafajshëm më pas, por kam mbajtur 15 muaj burg për shpifje, mirëpo Ibrahim Kelmendi nuk ka pasur vendqëndrim në Gjermani dhe nuk ndodhej në Gjermani, atëherë flitej që është në Shqipëri, ku flitet se edhe atje ka bërë shumë gjëra që di vetëm ai t’i bëjë. Në vitet e 70-ta ai ka ardhur në Gjermani si student, por gjer në vitet e 90-ta nuk ka kryer fakultet, gjë të cilin dyshoj që as tani s’e ka përfunduar. Ai siç thashë në kohën kur e kam paditur nuk ka qenë në Gjermani dhe për këtë gjykata më ka thënë se nëse kam ndonjë informatë ku gjendet Ibrahim Kelmendi t’u tregoj, sepse përndryshe ai nuk ka pasur vendqëndrim në Gjermani. Unë nga burgu jam liruar i pafajshëm dhe e kam paditur Ibrahim Kelmendin për shpifje. Ai mendon që e ka mashtruar drejtësinë gjermane dhe me këto gjëra, deklarata që po bën mendon se Kosova i ha dhe do të ngrisë pluhur. Por, këto gjëra që po mundohet t’i bëjë në Kosovë në Gjermani i janë hedhur poshtë nga gjykata dhe unë jam shpallur si i pafajshëm.

“Kosova Sot”: Kelmendi pretendon se në qershor të po atij viti 1980, pas hetimeve që bëjnë Jusufi, Bardhi, Hyseni, Maksuti dhe ai vetë, organizohet ballafaqimi i Jusufit me ju në banesë të Hysen Gegës në qytetin Eslingen, për të marrë vendim se çfarë qëndrimi duhet të mbahet ndaj atij urdhri. Të pranishëm në ballafaqim Jusufi, Bardhi, Ibrahimi, Hyseni dhe Maksuti. Jusufi lut që t’iu falet, siç e quan ai krimin tuaj, me kusht që të ndërprisni fushatën shpifëse. A është e vërtetë kjo dhe si reaguat ju në atë takim?

Salihu: Një takim i tillë nuk ka ndodhur në qershor, por në fillim të prillit të vitit 1980 dhe kjo është një gënjeshtër e radhës e Ibrahim Kelmendit. Unë në qershor jam takuar veç e veç me Hysen Gegën dhe Jusufin. Unë e lexova ku Ibrahim Kelmendi thotë se Riza filloi të qajë, por ai prapë gënjen, sepse unë nuk qaj dhe rrallë kush më ka parë duke qarë, sepse një gjë të tillë e kam bërë kur kam qenë i vogël. Nuk mund ta kuptoj pse po gënjen deri në këtë nivel. Me të vërtetë ai ka qenë një takim ku unë secilit ua kam përmendur pikat e dobëta, duke përfshirë Jusuf Gërvallën, Ibrahim Kelmendin e të tjerëve që kanë qenë prezentë. P.sh., Ramadan Selimi që ka punuar në konsullatë më ka thënë mos fol më ashtu si ke folur me disa njerëz, por unë ia kam kthyer se e di kush të ka treguar, e ai më tha lëre këtë po mos fol me askënd. Por, Ramadan Selimi është treguar burrë i ndershëm, sepse më ka këshilluar drejt, këtë gjë kur ia kam treguar Bardhit ka mbetur pa tekst. Ibrahim Kelmendi i ka thënë se ke shkuar në gusht-shtator të vitit të kaluar, që i binte më 1979 te Hyseni dhe përmes tij ke njoftuar shumë persona si Ibrahim Shalën, Xhavit Bashën, Fadil Vatën, Ruzhdiun, vëllain e Maksut Saramatës etj. Të gjithë këta njerëz janë burgosur për një ditë.

“Kosova Sot”: Do të thotë se për burgosjen e tyre fajtor është Ibrahim Kelmendi?

Riza Salihu: Normalisht, sepse ai i ka denoncuar dhe ka ardhur deri tek arrestimi i tyre. Jusuf Gërvalla vazhdimisht më thoshte se duhet të bisedojmë, por unë gjithmonë i thosha bisedojmë kur të duash, por i kam thënë çka të shtyni të thuash se jam anëtar i Komitetit Qendror të Kosovës. Ai në një mënyrë më thoshte besomë ti edhe nëse unë të gënjej, sepse ai nuk ka pasur asnjë organizatë. Edhe Ibrahim Kelmendi deri në vitin 1981 nuk ka pasur asnjë organizatë, dhe po këtë vit mediet jugosllave shkruanin se Ibrahim Kelmendi përfaqëson Frontin e Kuq Popullor, dhe ai atëkohë mbante disa etiketa të vogla ngjitëse ku shkruante vetëm Fronti i Kuq Popullor dhe asgjë tjetër. Kishte harmonizim apo të përbashkëta midis Ibrahim Kelmendit dhe shërbimeve sekte serbe, sepse askush nuk mund të nxjerrë fakt nga Beogradi, ngase ata janë njerëz të specializuar, sepse kur shkruajnë gjithë mediumet e Beogradit se kë e përfaqëson ai dhe ai vendos etiketa me Frontin e Kuq Popullor dhe burgos njerëz, kjo është shumë e qartë se për kë punonte ai.
“Plani ishte të më vrisnin mua, jo Gërvallën”

“Kosova Sot”: A është e vërtetë se në korrik e gusht ju keni organizuar vjedhjen e dërgesave postare të Jusuf Gërvallës, Ibrahim Kelmendit dhe të tjerëve, siç pretendon Kelmendi që thotë se policia gjermane ju ka zënë në flagrancë?

Salihu: Unë ua kam kontrolluar postën edhe Jusuf Gërvallës dhe Ibrahim Kelmendit. Ibrahim Kelmendit i dhemb leximi i postës, por vetëm për shkak të sigurisë i kam kontrolluar. Ibrahim Kelmendi që mua më akuzon që kam vrarë dikë, në të vërtetë është ai që ia ka dhënë revolen Hysen Gegës dhe që i shkruante letër që vegshin me rrymë të gjejë edhe më të mirë që e zien fasulen, edhe më mirë që aludonte se vegshi me rrymë në revole dhe fasulen plumbat dhe të gjejë edhe fasule të Tetovës, por ti duhet ta dish si dhe kur ta përdorësh, se kryetarit i keni dhënë shumë të drejta. Por këto kanë qenë metoda të tij dhe plani ka qenë të më vrasin mua e jo Jusuf Gërvallën, për këtë arsye edhe i kontrolloja postat e tyre, kuptohet jo çdo gjë, por ato që mundja. Letra e Ibrahim Kelmendit e ardhur nga Dyseldorfi fliste se ai i ka dhënë armë Hysen Gegës. Letra dhe arma janë gjetur te Hysen Gega dhe dihen nga kush kanë ardhur dhe për çka dhe të gjitha këto kanë rënë në duart e policisë. I kanë marrë armën dhe e kanë paditur, por nuk e kanë arrestuar. Por, para se Hysen Gegës t’i vijë vendimi i gjykatës në dhjetor të 1980 Jusuf Gërvalla dhe Ibrahim Kelmendi e dërgojnë atë në Kosovë, ku edhe është burgosur dhe ka mbajtur burg 10 vjet, megjithatë faktet dhe padia ekzistojnë.

“Kosova Sot”: Si do t’u përgjigjeshit fakteve që pretendon Kelmendi në padi se edhe pasi ju keni pranuar kushtin gjatë ballafaqimit me Jusufin, se nuk do të shpifni më, keni vazhduar me shpifje se Jusuf Gërvalla është udbash?
Salihu: U thashë se takim ndodhi në prill e jo në qershor dhe aty ua thashë të metat që kanë, ata u zmbrapsen dhe këtu nuk ka fakte, ndërkaq pohimet e Kelmendit janë të rrejshme.

“Kosova Sot”: Pse Hysen Gega u anëtarësua në Grupin Komunist “Zëri i Kosovës”, kryetar i të cilit ishit ju dhe pse u largua më pas. Kelmendi e quan atë patriot i orëve të para të emigracionit tonë në Gjermani.
Salihu: Kelmendi ka arritur të përmendë dhëndrin e tij, të vë kontakte me Hysenin dhe ky është manipuluar që ta kryejë një vrasje, dhe në fakt këto janë metoda të shërbimit sekret UDB për t’i eliminuar kundërshtarët. Këta gjithmonë kanë krijuar mjegullina mes njerëzve. Qëllimi i Ibrahim Kelmendit dhe Jusuf Gërvallës ka qenë për ta manipuluar Hysen Gegën pjesërisht. Por, unë po i bëj një pyetje Ibrahim Kelmendit, nëse Hysen Gega paska qenë shumë i mirë, atëherë pse e sollën në Kosovë dhe e futën në burg? Ata e sollëm në burg dhe i mbajti 10 vjet.
I gatshëm të përballet me Kelmendin

“Kosova Sot”: Ku shkuan dokumentet origjinale pas shpërbërjes së këtij grupi më 1980, siç përmend në arsyetim Kelmendi dhe pse vendoset ta shpërbëni grupin?

Salihu: E kam lexuar atë që ka thënë ai në “Kosova Sot”, dhe është një gënjeshtër më shumë që e thotë ai. Grupi “Zëri i Kosovës” nuk është shpërbërë në tetor të vitit 1980 ku janë djegur dokumentet. Në tetor të viti 1980 nuk ka ndodhur, sepse unë kam qenë në burg nga gushti i 1980 deri në shkurt të 1981. Në tetor të 1980 ishte po ky Ibrahim Kelmendi duke shfrytëzuar mungesën time fizike, ka shkuar nëpër vendet ku kanë jetuar shqiptarët dhe ka thënë ‘ja ky Riza që i keni besuar ka shkuar në “vezhbë” të UDB-së në Dalmaci’, për të shkaktuar dyshime dhe turbullime dhe tash na del që në tetor është mbajtur një takim, a e shihni se të gjitha këto janë gënjeshtra dhe asgjë më shumë.

“Kosova Sot”: Ai ju akuzon ju se keni vazhduar të shpifni edhe pas vrasjes së heronjve?
Salihu: Kush kundër kujt po shpif. Unë ju thashë që vrasja ka ndikuar që të hidhet një vështrim tjetër. Ai ka thënë se grupi është shpërbërë në vitin 1980, kurse ai është shpërbërë në vitin 1982. Unë para apo pas vrasjes nuk më ka interesuar shumë, sepse ai ka ardhur tek unë, e kam takuar dhe nuk do të hezitoja ta pranoja në “Zërin e Kosovës” sikur ta thoshte të vërtetën, kjo ishte, ai po shpif.

“Kosova Sot”: Çfarë ndodhi më 1989 kur hetuesia gjermane ju arrestojë ju si të dyshuar për vrasës dhe më pas në procesin gjyqësor në Gjykatën e Shtutgardit?
Salihu: Në tetor të vitit 1989 Ibrahim Kelmendi e ka dhënë një deklaratë kundër meje, në bazë të së cilës unë jam arrestuar në janar të viti 1990, ka zgjatur pak për shkak të përpunimit të lëndës. Kam qenë në burgun hetues për 15 muaj, më pas jam liruar dhe të gjitha deklaratat e Ibrahim Kelmendit kanë dalë të trilluara dhe gënjeshtra. Këto që i thotë tani nuk ka arritur ta mashtrojë drejtësinë kosovare dhe mendon ta mashtrojë publikun kosovar.

“Kosova Sot”: A jeni të gatshëm që të bashkëpunoni me prokurorinë për të zbardhur një herë e përgjithmonë atentatin kundër heronjve për çka Kelmendi ju akuzon ju si aktorin kryesor?

Salihu: Edhe këtu, edhe në Gjermani kam thënë dhe them se jam i gatshëm të bashkëpunoj me prokurorinë. Shpesh njerëzit më kanë thënë pse nuk ballafaqohesh me të, dhe ja ku i them se jam i gatshëm për një përballje me Ibrahim Kelmendin, ku ai do t’i shpaloste faktet e tij e unë të miat, me qëllim që të ndaleshin shpifjet. Unë kam marr vendim që ta padis Ibrahim Kelmendin për shpifje.

“Kosova Sot”: Z. Salihu, kush ishin për ju vëllezërit Gërvalla dhe Kadri Zeka?
Riza Salihu: Vëllezërit Gërvalla dhe Kadri Zeka e kanë pasur vdekjen e përbashkët. Me Kadri Zekën kam pasur kontakte të mira, sepse ai ka dashur të vijë në “Zërin e Kosovës”, dhe atë ka thënë me shokë, por nuk ishin shumë të vendosur dhe më vonë formuan OMLK (Organizata Marksiste Leniniste e Kosovës). Kadri Zeka më ka thënë po që se do të vijmë me shokë në “Zërin e Kosovës”, duhet të na trajtoni si të gjithë anëtarët e vjetër të organizatës, por i kam thënë se do ta shikojmë edhe ne, sepse emri grup më nuk përkonte, sepse ishte rritur dhe ishte fryrë shumë, dhe i kam thënë Kadri Zekës se do ta bëjmë një riorganizim dhe në momentin që do ta bëjmë atë do të ftoheshin. Kadri Zeka ka pasur për qëllim që të bëjë një redaksi ku do ta drejtonte, por ndodhi burgosja ime. Ndërkohë, nisi të dalë revista “Liria”, si organ i OMLK-së. Kurse për Jusuf Gërvallën edhe sot e kësaj ditë e kam bindjen se ai është dërguar nga shërbimi sekret serb?

“Kosova Sot”: Kjo që thoni është një akuzë e rëndë?
Salihu: E di që është akuzë e rëndë. Duhet të kthehemi në situatën që mbretëronte atëherë. Policia ka konkluduar që ata kanë pasur përkrahjen e një shteti tjetër. Ibrahim Kelmendi ka qenë i përshtatshëm për të dërguar informata. Është treguar i gatshëm të punojë si agjent i dyfishtë, pra ka punuar edhe me policinë gjermane. Në ditën kur u vranë ata, Ibrahim Kelmendi kishte thënë se ka qenë në klubin “Emin Duraku”, por në akte që unë i kam parë në burg për shkak të shpifjeve të tij që ka bërë ndaj meje, aty janë një kopje të biletës së trenit që ai atë ditë ka udhëtuar. Në mbrëmje rreth orës 18:00 ka hipur në tren për të udhëtuar për në Dyseldorf , ai e ka ditur shumë mirë se çka do të ndodhë atë ditë. Kur ka mbërritur në Dyseldorf i ka telefonuar policisë së Helbronit për t’i pyetur se a ka ndodhur diçka me shokët e mi dhe këto gjëra policia gjermane i ka të vërtetuara. Ky pastaj me ftesë të policisë ka shkuar në policinë e Helbronit, sepse polica ka dyshuar në të për shkak të thirrjes telefonike, mirëpo kjo polici nuk i ka ndjekur hetimet, por tjetër polici.
Keqpërdorimenë të dyja fondet

“Kosova Sot”: Në Perëndim është organizuar fondi i 3 përqindëshit, a keni qenë kontribuues i këtij fondi dhe a mendoni se paratë e këtij fondi janë shpërdorur nga kreu i qeverisë në ekzil Bujar Bukoshi dhe ministri i Financave, Isa Mustafa?
Salihu: Mendoj se paratë e 3 përqindëshit, nuk flas me fakte, por për atë që flasin njerëzit se abuzime ka pasur, mirëpo unë e kam parë Ibrahim Kelmendin që ka përmendur shifra marramendëse, pra të flasësh pa fakte është e pamoralshme. Nuk mund të them se janë dërguar kaq mjete në Beograd, përderisa nuk kam parë ndonjë dokument. Por, që ka pasur abuzime këto janë të vërteta. P.sh., Bujar Bukoshi ka blerë shtëpi në Gjermani, çka i duhet një kryeministri të Kosovës shtëpi në Gjermani, ky është një argument që të shtynë të mendosh që ka pasur abuzime, por jo në atë masë që i përmend Kelmendi.

“Kosova Sot”: Po Mustafa?Salihu: Isa Mustafa ka qenë ministër i 3 përqindëshit. Fillimisht kam qenë kontribuues, po kur kam kuptuar se Bujar Bukoshi blen shtëpi prej atëherë e kam ndërprerë.
“Kosova Sot”: Po për fondin “Vendlindja thërret” a keni kontribuar, a mendoni se edhe ky fond është shpërdorur dhe kush mendoni se ka abuzuar me mjetet e grumbulluara nga bashkatdhetarët tanë?
Salihu: Në të dyja fondet ka pasur keqpërdorime, por nuk mund të them se si kanë qenë ato, sepse nuk ka fakte.
“Kosova Sot”: A keni besim te drejtësia kosovare dhe a mendoni se kjo drejtësi do ta zbardhë rastin kur dihet se ai ka ndodhur në Gjermani?
Salihu: Kam besim në drejtësinë kosovare, me gjithë vërejtjet që kam, por nuk mendoj se drejtësia kosovare do të zgjidhë diçka që nuk ka arritur ta zgjidhë as Gjermania, kur kihet parasysh edhe fakti që ngjarja ka ndodhur në Gjermani.
“Kosova Sot”: Z. Salihu, a ishit ju agjent i UDB-së?
Riza Salihu: Jo. Këto gjëra di t’i shpikë vetëm Ibrahim Kelmendi, por për të ka shumë argumente se si i ka burgosur shokët.