Qosja: Xhemajl Mustafa ishte njeri i qetë, i urtë, nuk bënte keq, nuk fliste keq

Akademik Rexhep Qosja sjell librin “Dëshmitar në kohë historike”, Ditari VIII, Koha e protektoratit (1999-2001). Në këtë ditar, akademik Qosja sjell rrëfime të padëgjuara më parë për kohën e luftës dhe pasluftës.

23.11.2000

Sot afër shtëpisë së tij është vrarë gazetari e publicisti i njohur, zëdhënësi i LDK-së, Xhemajl Mustafa.

Ky lajm i zi më tronditi shumë.

Xhemajl Mustafa ishte njeri i qetë, i urtë, nuk bënte keq, nuk fliste keq, shkruante për veprat letrare e shkencore të atyre me të cilët pajtohej dhe të atyre me të cilët mund të mos pajtohej politikisht. Ai kishte shkruar fare mirëkuptueshëm edhe për ndonjë vepër timen.

Kush mund ta ketë vrarë? Kush?

Nuk vriten krijuesit! Nuk vriten gazetarët!

Ç’është kjo dhunë shkatërruese, që po na rrezikon si popull! Edhe stacione të huaja televizive e japin lajmin për vrasjen e

Xhemajl Mustafës, për këtë vrasje më zi se kriminale! E dënoj me mendje e me shpirt këtë vrasje skajshëm tragjike.